Por helpi lernantojn de Esperanto en elementaj lernejoj, mi verkis, en 1993, 222 Simplajn Versaĵojn por Komencantoj, kiun utiligis en- kaj eksterlandaj kursoj kun certa sukceso. Kuraĝigite de tio, mi daŭrigis la verkadon de simplaj versaĵoj kaj en 2002 mi sukcesis verki pli ol 1500 tiajn rimaĵojn kaj tiam venis al mi en la kapon la ideon eldoni vortareton de la plej ofte uzataj radikoj kun tiaj versaĵoj, sekve formiĝis mia Esperanta Vortaro por Lernantoj kun pli ol 2000 redikoj ilustritaj per versaĵoj. Informiĝinte pri tio, mia japana amiko Mine Yositaka decidis ĝin aperigi en la organo de KLEG La Movado. Kaj poste ankaŭ la interreta EPĈ ĝin aperigis. Dum la 89-a UK en Pekino, mi renkontis kelkajn interesitojn pri mia laboro, kiuj min kuraĝigis por daŭrigi la laboron. Hodiaŭ mi jam sukcesis verki pli ol 3900 versaĵojn por Esperantaj radikoj kaj derivaĵoj inkluzive de pli ol 670 vortaj enigmoj. Ni decidis ĝin eldoni libroforme kun la titolo Esperanta Vortaro por Lernantoj.

    La celo de la vortareto estas havigi al la lernantoj kutimon pensi en Esperanto, tial la radikoj, kunmetitaj kaj derivitaj vortoj estas difinitaj en Esperanto. Mi klopodis doni difinojn en simpla lingvo, sed mi ne ĉiam sukcesis tion fari, ĉar mi timas fari erarojn en klarigo pri terminoj kaj fakaj vortoj, kiujn mi ne tiel profunde konas. Por eviti misaĵojn, mi transprenis pretajn difinojn el la plej fidindaj vortaroj ekzistantaj. Mi ŝuldas koran dankon al la pioniraj leksikologoj de Esperanto pro ilia valora laboro. Mi tamen scias, ke tio ne estas bona solvo, sed kion mi povas fari en la nuna momento? Estas neeble por mi tiel multe progresi per mia lernado en mallonga tempo! Mi venas al la ideo peti helpon de niaj spertaj leksikologoj kaj mi esperas, ke iuj el vi helpos min reverki simplajn difinojn de sciencaj terminoj kaj fakaj vortoj por helpi la komencantojn de nia lingvo.

    La tuta vortaro konsistas el iom pli ol 4000 radikoj kaj la fakaj vortoj estas malpli ol kvarono. Se vi bonvolos kunlabori, vi disponos tempon de 3 monatoj (ĝis la fino de nov. 2011) por plenumi la taskon. Se ni korespondos per retmesaĝoj, facile solviĝos la problemo de transsendo de tekstoj, ĉu ne? Bonvole prezentu al mi viajn bonajn ideojn kaj proponojn, kaj ankaŭ postulojn, se tion vi havas. Mi atendas viajn helpemajn manojn kun antaŭaj dankoj. Jen mia retadreso: laulum_li@hotmail.com.

( Chen Ji )

el  esperanto.china

Redaktoro:Xin Ying